უიღბლო ანხელ დი მარია ანხელ დი მარია დაბრუნდა, გაიტანა და ისევ დაიმტვრა - ბოლო ხანებში "რეალის" არგენტინელი ნახევარმცველი მეტისმეტად უიღბლო გახდა.
23 თებერვალს, "რასინგთან" დამტვრეულ დი მარიას, ექიმებმა დიაგნოზი დაუსვეს - ანხელმა მარჯვენა ფეხზე მყესები გაიწყვიტა და ახლა მას ერთი თვე ლაზარეთში მოუწევს ყოფნა.
ეს დიდი დარტყმაა ჟოზე მოურინიოსთვის, რომელმაც ახლახან ქარიმ ბენზემა 2-3 კვირით დაკარგა. შეგახსენებთ, რომ დი მარია 13 საგოლე პასით ლა ლიგის წლევანდელი სეზონის ასისტენტთა ლიდერია.
კანტაბრიელებთან მატჩამდე დი მარიას თითქმის თვე-ნახევარი ჰქონდა გამოტოვებული, "რასინგთან" ჟოზემ არგენტინელს 30 წუთი მისცა სათამაშოდ და ანხელმაც ტურის ერთ-ერთი ულამაზესი გოლი გაიტანა. მაგრამ მერე სტუმარ კრისტიანთან შეჯახებისას ბოლო 2 თვეში მესამე ტრავმა მიიღო.
ტრავმებმა ფეხბურთელს უკვე გამოატოვებინეს 14 მატჩი და კიდევ 5-ის გამოტოვება "გარანტირებული" აქვს. 20-მდე მატჩი სეზონში, ძალიან ბევრია მოუს სქემის ერთ-ერთი უმთავრესი ფიგურის გამოკლებისთვის.
|